மத்திய அரசின் அதிரடி… புதுச்சேரியில் 11 பெண் எம்எல்ஏக்கள் உறுதி ; ஆளுநர் தமிழிசை சவுந்தரராஜன் ஹேப்பி…!!

மத்திய அரசின் செயலால் புதுச்சேரியில் 11 பெண் எம்எல்ஏக்கள் தேர்வாவார்கள் என்று ஆளுநர் தமிழிசை சவுந்தரராஜன் தெரிவித்துள்ளார்.

புதுச்சேரி கோரிமேடு அருகே உள்ள ஆலங்குப்பம் அரசு தொடக்கப்பள்ளி மற்றும் உயர்நிலைப்பள்ளியில் அமைக்கப்பட்ட ஸ்மார்ட் வகுப்பறையை ஆளுநர் தமிழிசை சவுந்தரராஜன் பார்வையிட்டார். அப்போது, மாணவர்களோடு கலந்துரையாடி பாடம் நடத்தினார். மேலும், மாணவர்களுக்கு மதிய உணவினையும் பரிமாறினார்.

தொடர்ந்து, செய்தியாளர்களிடம் அவர் பேசியதாவது :- பெண்களுக்கு சட்டமன்றம், நாடாளுமன்றத்தில் 33 சதவீத இடஒதுக்கீடு வழங்க பிரதமர் மோடி முடிவெடுத்துள்ளார். இது பெண்கள் பொதுவாழ்க்கைக்கு வர உதவியாக இருக்கும். இந்த இடஒதுக்கீட்டின் மூலம் புதுச்சேரியில் 11 பெண் எம்.எல்.ஏ.க்களும், தமிழகத்தில் 77 பெண் எம்.எல்.ஏ.க்களும், 13 பெண் எம்.பி.க்களும் இருப்பார்கள்.

ஆளுநர் உண்மையாக மக்களுக்காக பணியாற்ற வேண்டும் என்று அடிப்படையில் என்னிடம் வரும் கோப்புகள், அதிகாரிகளிடம் இருந்து கிடைக்கும் தகவல்களின் அடிப்படையில்தான் சிலவற்றை தெரிவிக்கிறேன். அதற்காக பதவியை ராஜினாமா செய்ய வேண்டிய அவசியம் இல்லை.

குடும்ப தலைவிகளுக்கு உதவித்தொகை வழங்கும் திட்டம் நல்ல எண்ணத்தோடு தொடங்கப்பட்டு நடைமுறைப்படுத்தப்பட்டு உள்ளது.

அரசுப்பள்ளி மாணவர்களுக்கு ஏதாவது செய்ய வேண்டும் என்ற எண்ணத்தில்தான் மிகவும் கடுமையாக முயற்சித்து மருத்துவ கல்வியில் 10 சதவீத இடஒதுக்கீட்டை பெற்றுள்ளோம். அதற்காக நன்றி தெரிவித்து பிரதமருக்கு மாணவிகள் கடிதமும் எழுதியுள்ளனர், எனக் கூறினார்.