தமிழிசைக்கு ஆழ்ந்த அனுதாபங்கள்… படாத பாடுபட்டு பாமகவை கூட்டணியில் சேர்த்த பாஜக ; கே.பாலகிருஷ்ணன் விமர்சனம்..!!

படாத பாடுபட்டு பாமகவை பாஜக கூட்டணியில் சேர்த்துள்ளதாகவும், தோற்றுவிடுவோம் என தெரிந்தும் ஆளுநர் பொறுப்பை ராஜினாமா செய்துவிட்டு போட்டியிடும் தமிழிசைக்கு அனுதாபங்கள் என மார்க்சிஸ்ட் கம்யூனிஸ்ட் மாநில செயலாளர் கே.பாலகிருஷ்ணன் தெரிவித்துள்ளார்.

திமுக கூட்டணியில் மார்க்சிஸ்ட் கம்யூனிஸ்டு சார்பில் மதுரை நாடாளுமன்ற தொகுதி வேட்பாளராக அறிவிக்கப்பட்டுள்ள சு.வெங்கடேசனுக்கு பரப்புரை மேற்கொள்ளும் பணியின் ஒரு பகுதியாக நடைபெறும் சிறப்பு பேரவை கூட்டத்தில் அக்கட்சியின் மாநில செயலாளர் கே.பாலகிருஷ்ணன் பங்கேற்றார்.

அப்போது, செய்தியாளர்களை சந்தித்தவர், “அமைச்சர் பொன்முடிக்கு பதவி பிரமாணம் செய்து வைக்கக் கோரி முதலமைச்சர் அனுப்பிய கடிதத்தை ஆளுநர் நிராகரித்திருப்பது அரசமைப்பு சட்டத்திற்கு விரோதமானது. முதலமைச்சர் முன்மொழியும் நபர்களுக்கு என்ன தகுதி இருக்கிறது என பார்ப்பது ஆளுநரின் வேலை அல்ல. ஆளுநர் பழிவாங்கும் நோக்கத்துடன் செயல்படுகிறார். சட்ட வரம்பு மீறி ஆளுநர் செயல்படுகிறார்.

எதிரணியில் இருப்பவர்கள் கூட்டணி குழப்பத்தில் உள்ளனர். இதுவே 40 தொகுதியிலும் திமுக தலைமையிலான கூட்டணி வெற்றி பெறும் சூழல் ஏற்பட்டுள்ளதை காண்பிக்கிறது. என்ன தான் ஆளுநரை, விசாரணை அமைப்புகளை பயன்படுத்தினாலும் தமிழ்நாட்டில் பாஜகவால் வெற்றி பெற முடியாது. ஹரியானா உட்பட பல மாநிலங்களில் பாஜகவிடமிருந்து கூட்டணி கட்சிகள் விலகி கொண்டிருக்கின்றன.

பிரச்சாரத்திற்குரிய கால அவகாசம் கூட தராமல் தேர்தல் தேதிகள் அறிவிக்கப்பட்டுள்ளன. உண்மையில் மோடியின் நோக்கத்தை நிறைவேற்றும் வகையில் தான் தேர்தல் ஆணையம் செயல்பட்டுள்ளது. மோடி ஏற்கனவே 3 மாதமாக தமிழ்நாட்டில் தேர்தல் பிரச்சாரத்தை முடித்து விட்டார். எனவே மோடி தான் தேர்தலை அறிவித்துள்ளார் போல தெரிகிறது.

பாஜக தோற்றுவிடும் என தெரிந்திருந்தும் ஆளுநர் பொறுப்பை ராஜினாமா செய்துவிட்டு இப்போது தேர்தலில் போட்டியிடவுள்ளார் தமிழிசை. பாவம் அவர்களுக்கு என்ன சொல்வது என தெரியவில்லை. அவர்களுக்கு அனுதாபத்தை தெரிவித்து கொள்கிறோம். படாதபாடு பட்டு பாமகவை கூட்டணியில் சேர்த்துள்ளது பாஜக. பாமகவை கூட்டணியில் சேர்த்து கொண்டு வாரிசு அரசியல் பற்றி மோடி பேசலாமா? கூட்டணிக்காக உங்களுடைய கொள்கையை நீங்களே மீறி விட்டீர்களே,” எனக் கூறினார்.