GOAT வசூல் இவ்வளவுதானா? உண்மையை போட்டுடைத்த அர்ச்சனா கல்பாத்தி!

கோட் (GOAT) பட வசூலில் ரிலீஸுக்கு முந்தைய வியாபாரத்தைச் சேர்த்தால் இன்னும் பெரிதாக இருக்கும் என அர்ச்சனா கல்பாத்தி கூறியுள்ளார்.

சென்னை: விரைவில் வெளியாக உள்ள ‘டிராகன்’ படத்தின் புரோமோஷன் நிகழ்ச்சிகளில், தயாரிப்பாளர் அர்ச்சனா கல்பாத்தி கலந்து கொண்டு வருகிறார். அந்த வகையில், இந்தப் படத்தின் புரோமோஷன் நிகழ்வு ஒன்றில் பேசிய அவர், கோட் படத்தின் உண்மை வசூல் நிலவரத்தைப் பற்றிக் கூறியுள்ளார்.

இது தொடர்பாக பேசிய அர்ச்சனா கல்பாத்தி, “ கோட் படம் 450 கோடி ரூபாய் வசூல் என்று போட்டுக் கொண்டிருக்கின்றனர். அதில், திரையரங்கைத் தாண்டி உள்ள வியாபாரம் எதுவும் சேர்க்கப்படவில்லை. எனவே, அதனையும் சேர்த்தால் வசூல் இன்னும் பெரிதாக இருக்கும்.

நாங்கள் என்ன வசூல் என்று சொன்னோமோ அது திரையரங்கத்தின் மொத்த வசூல் மட்டுமே. அதில் இருந்து வரியை எல்லாம் கழித்துக் கணக்கிட வேண்டும். பெரிய படங்களுக்கு வெளியீட்டுக்கு முன்பே திரையரங்க வசூலைத் தாண்டிய அனைத்து வியாபாரமும் பெரிய உறுதுணையாக இருக்கும்.

அதிலிருந்தே பெருவாரியான பணத்தை எங்களால் எடுத்துவிட முடியும். இதனால் திரையரங்க வசூலில் இருந்து வரும் பெரும்பாலான தொகை லாபமாகவே இருக்கும்” எனத் தெரிவித்துள்ளார். இந்த பேட்டியை அடுத்து, விஜய் ரசிகர்கள் குஷியில் இருந்து வருகின்றனர்.

இதையும் படிங்க: பொன் விழா நாயகனுடன் கைகோர்க்கும் கிருத்திகா உதயநிதி.. Comeback கிடைக்குமா?

ஏஜிஎஸ் நிறுவனம் தயாரிப்பில், இயக்குநர் வெங்கட் பிரபு இயக்கத்தில் வெளியான படம் The Greatest of All Time என்ற கோட் (GOAT). விஜய், மோகன், பிரபுதேவா, பிரசாந்த், சினேகா, மீனாட்சி செளத்ரி, ஜெயராம் உள்ளிட்ட பலர் நடித்திருந்தனர். யுவன் சங்கர் ராஜா இசையில் வெளியான இப்படம், தமிழகத்தில் மாபெரும் வரவேற்பைப் பெற்றது.

மேலும், ஓ மை கடவுளே பட இயக்குநர் அஸ்வத் மாரிமுத்து இயக்கியுள்ள டிராகன் திரைப்படத்தில் பிரதீப் ரங்கநாதன், அனுபமா, கயாடு லோகர் ஆகியோர் நடித்துள்ளனர். ஏஜிஎஸ் நிறுவனம் தயாரித்துள்ள இப்படத்திற்கு லியோன் ஜேம்ஸ் இசையமைத்துள்ள நிலையில், வருகிற பிப்ரவரி 21ஆம் தேதி படம் வெளியாக உள்ளது.

ரசிகர்களுக்கு சர்ப்ரைஸ்… பிறந்தநாளன்று சிவகார்த்திகேயன் எடுத்த அதிரடி முடிவு!