பண்ணை வீட்டில் பசுமை விருந்து…. திருமண அழைப்பிதழுடன் அறிவிப்பு வெளியிட்ட அசோக் செல்வன் – கீர்த்தி பாண்டியன்!

நடிகர் அசோக் செல்வன் சூது கவ்வும், தெகிடி, ஓ மை கடவுளே, நித்தம் ஒரு வானம் என போன்ற நல்ல படங்களை தேர்ந்தெடுத்து நடித்து பிரபலமான நடிகராக அறியப்பட்டார். இவரது சினிமா கெரியர் பில்லா 2 படத்தில் தான் ஆரம்பித்தது. அதன் பிறகு தெகிடி திரைப்படத்தின் மூலம் அனைவரது கவனத்தையும் ஈர்த்தார்.

தொடர்ந்து ஆரஞ்சு மிட்டாய், சவாலே சமாளி, 144 , கூட்டத்தில் ஒருத்தன் , முப்பரிமாணம் , உள்ளிட்ட படங்களில் நடித்து பெரிதாக வரவேற்புகள் கிடைக்காமல் மார்க்கெட் இழந்தார். அதன் பிறகு ஓ மை கடவுளே திரைப்படம் அவருக்கு மாபெரும் ஹிட் கொடுத்தது. அந்த படத்தில் நடித்த நடிகை ரித்திகா சிங்குடன் அவர் கிசுகிசுக்கப்பட்டார். இருவரது கெமிஸ்ட்ரியும் படத்தில் நன்றாக ஒர்கவுட் ஆகியிருந்தது.

இவர்கள் நிஜத்தில் காதலித்தால் கூட சிறந்த ஜோடியாக இருப்பார்கள் என ரசிகர்கள் விருப்பம் தெரிவித்தனர். ஆனால், அசோக் செல்வனுக்கு பிரபல நடிகர் அருண் பாண்டியனின் மகள் கீர்த்தி பாண்டியன் உடன் திருமணம் நிச்சயம் செய்யப்பட்டுள்ளது. இவர்கள் இருவரும் சேர்ந்து ப்ளூ ஸ்டார் என்ற படத்தில் நடித்த போது காதல் மலர்ந்ததாகவும் பின்னர் பெற்றோர்கள் சம்மதத்துடன் திருமணம் நிச்சயிக்கப்பட்டதாகவும் கூறப்படுகிறது.

இந்நிலையில் இவர்கள் திருமண அழைப்பிதழ் சமூகவலைத்தளங்களில் வெளியாகி வைரலாகி வருகிறது. அதில் வரும் செப்டம்பர் 13-ம் தேதி கீர்த்தி பாண்டியனின் சொந்த ஊரான திருநெல்வேலி இட்டேரி என்ற இடத்தில் அவர்களுக்கு சொந்தமான சேது அம்மாள் பண்ணை வீட்டில் இந்த திருமணம் நடைபெறவிருப்பதாகவும், பசுமை விருந்துடன் உபசரிப்பு நடைபெறும் எனவும் குறிப்பிடப்பட்டுள்ளது.