தூங்குவதற்கும் எழுவதற்கும் சரியான நேரத்தைக் கணக்கிடுவது எப்படி???

நாம் நம் வாழ்வில் மூன்றில் ஒரு பகுதியை தூங்குவதில் செலவு செய்கிறோம். இருப்பினும் பலருக்கு தூங்குவதில் சிக்கல் உள்ளது. இது ஒருவரின் உடல் மற்றும் மன ஆரோக்கியத்தை பாதிக்கிறது. ஏனெனில், தூக்கம் என்பது நமது ஆரோக்கியத்தையும், நம் அழகையும் ரீசார்ஜ் செய்கிறது. நாம் ஒரு குறிப்பிட்ட நேரத்தில் படுக்கைக்குச் சென்றால் இந்த சிக்கலை எளிதில் தீர்க்க முடியும். தூங்கவும், எழுந்திரிக்கவும் சரியான நேரத்தைக் கணக்கிடுவது எப்படி என்பதைப் பார்ப்போம்.

எப்போது எழுந்திருக்க வேண்டும் என்பதைத் தேர்ந்தெடுக்கவும்:
உங்களுக்கான சிறந்த தூக்க அட்டவணை என்ன என்பதை அறிய, நீங்கள் எழுந்திருக்க விரும்பும் நேரத்தை நீங்கள் தீர்மானிக்க வேண்டும். அதிகாலையில் எழுவதற்கும் அல்லது மதியம் வரை தூங்குவதற்கும் எந்த வித்தியாசமும் இல்லை என்று சமீபத்திய ஆராய்ச்சி சுட்டிக்காட்டுகிறது. ஆனால் நீங்கள் புத்துணர்ச்சியுடன் மற்றும் நிதானமாக எழுந்திருக்க விரும்பினால், வாரத்தில் 7 நாட்களுக்கு ஒரே நேரத்தில் அலாரத்தை அமைக்க வேண்டும் என்பதை நினைவில் கொள்வது அவசியம்.

நீங்கள் தூங்குவதற்கு எவ்வளவு நேரம் தேவை என்பதை அறிந்து கொள்ளுங்கள்:
தூக்கத்தின் அளவு நம் வாழ்நாள் முழுவதும் மாறிக்கொண்டே இருக்கும். நாம் குழந்தையாக இருந்தபோது, 14 மணிநேரம் வரை தூங்க வேண்டியிருந்தது. ஆனால் 20-40 வயதில், நமக்கு 7 முதல் 9 மணிநேர தூக்கம் மட்டுமே தேவை. நீங்கள் முழு ஆற்றலுடன் எழுந்திருப்பதற்கு முன் நீங்கள் வழக்கமாக எவ்வளவு தூங்குகிறீர்கள் என்பதைப் பற்றி சிந்தியுங்கள். மேலும் உங்களுக்கான சரியான அளவு என்ன என்பதைக் கண்டுபிடியுங்கள்.

எந்த நேரத்தில் தூங்க வேண்டும் என்று கணக்கிடுங்கள்:
நீங்கள் எந்த நேரத்தில் எழுந்திருப்பீர்கள் மற்றும் எத்தனை மணிநேர தூக்கம் தேவை என்பதை நீங்கள் அறிந்தவுடன், எப்போது படுக்கைக்குச் செல்ல வேண்டும் என்பதற்கான சரியான சூத்திரம் உங்களிடம் இருக்கும். இந்த அட்டவணையை நீங்கள் கடைபிடித்தால், உங்களுக்கு அதே நேரத்தில் இயற்கையாகவே தூக்கம் வந்துவிடும் மற்றும் நீங்கள் எளிதாக எழுந்திருக்க முடியும்.

உங்கள் வயது மற்றும் அனுபவத்தின் அடிப்படையில், உங்களுக்கு 7 மணிநேர தூக்கம் தேவை என்று உங்களுக்குத் தெரியும். மேலும் நீங்கள் தினமும் காலை 8 மணிக்கு எழுந்திருக்க வேண்டும் என்று முடிவு செய்கிறீர்கள் என்றால், நீங்கள் அதிகாலை 1 மணிக்கு படுக்கைக்குச் செல்ல வேண்டும். ஆனால் உங்கள் அட்டவணையை மாற்றிவிட்டு காலை 6 மணிக்கு எழுந்திருக்க முடிவு செய்தால், அந்த நிமிடத்திலிருந்து ஒவ்வொரு நாளும் இரவு 11 மணிக்கு தூங்க செல்ல வேண்டும்.

சீக்கிரமாக படுக்கைக்கு செல்ல வேண்டிய அவசியமில்லை
சிறந்த தரமான தூக்கத்தைப் பெற மக்கள் இரவு 10 மணியளவில் தூங்க வேண்டும் என்று பெரும்பாலும் நம்பப்படுகிறது. ஆனால் ஹார்வர்டின் சமீபத்திய ஆய்வு இது தவறு என்று நிரூபித்துள்ளது. நீங்கள் அதிகாலை 3 மணிக்கு படுக்கைக்குச் சென்று காலை 10 மணிக்கு எழுந்தாலும், இதனை நீங்கள் தொடர்ந்து செய்யும் வரை பரவாயில்லை.

சீரான தூக்க அட்டவணையை பின்பற்றவும்:
உங்கள் தூக்கத்தின் தரத்தை மேம்படுத்த நீங்கள் செய்யக்கூடிய சிறந்த விஷயம், ஒவ்வொரு நாளும் ஒரே நேரத்தில் படுக்கைக்குச் செல்வதாகும். இது தூங்குவதை எளிதாக்குவது மட்டுமல்லாமல், அது உங்களை புத்திசாலியாகவும் மகிழ்ச்சியாகவும் மாற்றும். மறுபுறம், வார நாட்களில் போதுமான தூக்கம் கிடைக்காதது மற்றும் வார இறுதி நாட்களில் கூடுதலாக தூங்குவது நீரிழிவு, உடல் பருமன் மற்றும் மோசமான இருதய ஆரோக்கியத்திற்கு வழிவகுக்கிறது.