அஜித் -51 : தமிழ் திரையுலகின் “சாம்ராஜ்யமே”.!

இன்று 51-வது பிறந்த நாளை கொண்டாடும் நடிகர் அஜித் குமார், இதுவரை 60 திரைப்படங்களில் நடித்துள்ளார். அவரது வாழ்க்கையில் பல ஏற்ற இறக்கங்களை சந்தித்து பல சாதனைகளை நிகழ்த்தியுள்ளார். ஆனால் என்றைக்கும், அவரது ரசிகர்களாலும், மற்ற நடிகர்களின் ரசிகர்களாலும் நேசிக்ககூடிய அமைதியான நடிகராகவும், அன்பான மனிதராகவும் பார்க்கப்படுகிறார். அதற்கான காரணங்கள் என்ன என்பது குறித்து பார்க்கலாம்.

எந்தவொரு சினிமாப் பின்னணியும் இல்லாமல், தமிழ்த் திரையுலகில் நுழைந்து, தனது கடின உழைப்பால் முன்னேறி, தனக்கென ரசிகர்கள் கூட்டத்தைத் தனது நடிப்பால் உருவாக்கி இருக்கிறார். தெலுங்குத் திரைப்படத்தில், துணைக் கதாபாத்திரத்தில் அறிமுகமாகி, பல்வேறு கதாபாத்திரங்களில் நடித்து, தென்னிந்தியத் தமிழ்த் திரைப்பட முன்னணி நடிகர்களுள் ஒருவர் என்ற சாதனையை படைத்தவர். திரை வாழ்க்கையில் சாதனையும், சோதனையும் சூழப்பட்டப் போதும் பீனிக்ஸ் பறவையாக எழுந்த திரைக் கலைஞன்.

மூன்று முறை ‘ஃபிலிம்ஃபேர் விருதுகளையும்’, இரண்டு முறை ‘சினிமா எக்ஸ்பிரஸ் விருதுகளையும்’, இரண்டு முறை ‘தமிழ்நாடு மாநில அரசு விருதுகள்’ எனப் பல்வேறு விருதுகளை வென்றுள்ள அவர், ஒரு கார் பந்தய வீரராகவும் புகழப்படுபவர். பாலக்காடு தமிழரான சுப்ரமணியம் என்பவருக்கும், கொல்கத்தா சிந்தி சமூகத்ததை சேர்ந்த மோகினி என்பவருக்கும் இரண்டாவது மகனாக மே மாதம் 1 ஆம் தேதி, 1971 ஆம் ஆண்டில் பிறந்தார்.

தனது பள்ளிப்படிப்பைத் தொடங்கிய அவர், படிப்பின் மீது ஆர்வமற்றவராகவே இருந்தார். இதனால் 1986ல் தனது உயர்நிலைக் கல்வியைத் தொடங்குவதற்கு முன்பே, பெற்றோர்களின் விருப்பத்தையும் எதிர்த்துத் தனது பள்ளிப்படிப்பை நிறுத்திக்கொண்டார்.

தொடர்ந்து, பைக் மெக்கானிக்காகப் பணியில் சேர்ந்தார். பைக், கார் ஓட்டுவதில் அதிக ஆர்வம் காட்டிய அவர், தானாகவே அவற்றை ஓட்ட கற்றுக்கொண்டு, அதற்கான உரிமத்தையும் பெற்றார். பைக் பந்தயம் தான் தனது தொழில் பாதை என்று தேர்ந்தெடுத்த அவர், அதில் கலந்து கொள்ளப் பணம் வேண்டுமென்பதால், அவ்வப்போது, சிறு சிறு பத்திரிக்கை விளம்பரங்கள் மற்றும் தொலைக்காட்சி விளம்பரங்களில் நடித்து வந்தார். பைக் பந்தயத்தின் போது ஏற்பட்ட காயத்தினால், அவரைப் பல வணிக முகவர்கள் அச்சு ஊடகங்களின் விளம்பரங்களில் நடிக்க வைக்க அவரைத் தூண்டினர். இதனால், அவருக்குப் பல திரைப்பட வாய்ப்புகள் குவிந்தது. ‘பந்தயமா? சினிமாவா?’ என்று வந்த போதுஇ அவர் பணம் சம்பாதிக்க வேண்டுமென்ற எண்ணத்தினால், சினிமாவில் காலடி எடுத்து வைத்தார்.

1991ல், தெலுங்குத் திரைப்படம் ஒன்றில் ஒப்பந்தமான அஜித்துக்கு, அப்படத்தின் இயக்குனர் மரணமடைந்ததால் அதில் நடிக்கும் வாய்ப்பு பறிபோனது. பின்னர், ஓர் ஆண்டுகள் கழித்து, 1992 இல் ‘பிரேம புஸ்தகம்’ என்ற தெலுங்குத் திரைப்படத்தில் அறிமுகமானார். அப்படம் அவருக்கு ‘சிறந்த புதுமுகத்திற்கான விருதைப்’ பெற்றுத் தந்தது. அதே ஆண்டில், செல்வா இயக்கத்தில், ‘அமராவதி’ படத்தில் நடிக்க வாய்ப்பு கிடைத்தது. இதுவே, தமிழ்த் திரையுலகில் அவரது முதல் படமாகும். இதைத் தொடர்ந்து அவர், ‘பாசமலர்கள், பவித்ரா, ராஜாவின் பார்வையிலே, ஆசை போன்ற படங்களில் நடித்தார். இதில், ஆசை’ திரைப்படம் அவருக்குப் பெரும் திருப்புமுனையாக அமைந்ததோடு மட்டுமல்லாமல், தமிழ்த் திரையுலகில், ‘வளர்ந்து வரும் நட்சத்திரம்’ என்ற அந்தஸ்த்தையும் பெற்றுத் தந்தது.

தனது இயல்பான மற்றும் இயற்கையான நடிப்பில் ரசிகர்கள் மனதில் இடம்பெற்ற அஜித் குமார், வான்மதி, காதல் கோட்டைஇ உல்லாசம், காதல் மன்னன் போன்ற காதல் படங்களில் நடித்து வந்தார். அமர்களம் படம் அவருடைய வேறுபட்ட நடிப்பை வெளிப்படுத்தினார். தொடர்ந்து பல படங்களில் நடித்து தனக்கென ஓர் இடத்தினை தமிழ் திரையுலகில் தக்க வைத்தார். அஜித்தின் ஒரு திரைப்படத்திற்கான ஓப்பனிங் வேறு எந்தவொரு நடிக்கருக்கும் கிடைக்காதது.

இளமைப் பருவத்திலிருந்தே ரேஸ் கார், பைக் ஓட்டுவதில் ஆர்வம் காட்டி வந்தவர் அஜித். மும்பை, சென்னை, தில்லி போன்ற இடங்களில் நடந்த கார் ரேஸ்களில் கலந்துகொண்டு வெற்றிப் பெற்றுள்ளார். மேலும் சர்வதேச அரங்க ரேஸ்களில் பங்கேற்கும் இந்தியர்களுள் ஒருவர் என்றும், ஃபார்முலா சாம்பியன் போட்டியில் வென்ற ஒரே இந்திய நடிகரென்ற பெருமையையும் பெற்றார். ஜெர்மனி, மலேஷியா உள்ளிட்ட பல்வேறு நாடுகளில் நடந்த போட்டிகளில் கலந்துகொண்ட அவர், 2003 ஆம் ஆண்டு ஃபார்முலா ஆசியா பிஎம்டபள்யு சாம்பியன்ஷிப் போட்டியில் போட்டியிட்டார். அது மட்டுமல்லாமல், 2010ஆம் ஆண்டு ஃபார்முலா 2 சாம்பியன்ஷிப் பந்தயங்களில் கலந்துகொண்ட மூன்று இந்தியர்களுள் இவரும் ஒருவர் என்பது குறிப்பிடத்தக்கது.

அமர்க்களம் படத்தின் போது, நடிகை ஷாலினியுடன் ஏற்பட்ட காதலால், இருவரும் திருமணம் செய்துக்கொண்டார். அஜித் – ஷாலினி தம்பதியினருக்கு அனோஷ்கா, ஆத்விக் என மகளும், மகனும் உள்ளனர். திரையுலகில் மென்மேலும் புகழ்ப்பெற்று சாதனைப் படைக்க வேண்டும் என்று அஜித்தை வாழ்த்துவோம், பிறந்தநாள் வாழ்த்துகள் அஜித்குமார்.