தொகுதிப் பார்வையாளர்களுக்கு பறந்த உத்தரவு!

திமுக சட்டமன்றத் தொகுதிப் பார்வையாளர்களுக்கும் சீட் வழங்கப்படும் என மு.க.ஸ்டாலின் உறுதி அளித்துள்ளார்.

சென்னை: சென்னை தேனாம்பேட்டையில் உள்ள திமுக தலைமையகமான அண்ணா அறிவாலயத்தில், திமுக தலைவரும், முதலமைச்சருமான மு.க.ஸ்டாலின் தலைமையில், 2026 சட்டமன்றத் தேர்தல் பணிகளை மேற்கொள்ளும் வகையில் நியமிக்கப்பட்டுள்ள, சட்டமன்றத் தொகுதி பார்வையாளர்கள் ஆலோசனைக் கூட்டம் இன்று (அக்.28) நடைபெற்றது.

இந்தக் கூட்டத்தில் திமுக பொதுச் செயலாளர் துரைமுருகன், பொருளாளர் டி.ஆர்.பாலு, முதன்மைச் செயலாளர் கே.என்.நேரு, துணை பொதுச் செயலாளர்கள் மற்றும் திமுக நிர்வாகிகள் உட்பட பலர் கலந்து கொண்டனர்.

பின்னர், இந்தக் கூட்டத்தில் பேசிய மு.க.ஸ்டாலின், “2026 தேர்தலுக்காக சட்டமன்றத் தொகுதி பார்வையாளார்களாக நியமிக்கப்பட்டு விட்டதால், தேர்தலில் சீட் கிடைக்காது என்று நீங்கள் கவலைப்பட வேண்டாம். உங்களுக்கும் வாய்ப்பு வழங்கப்படும்.

கட்சி அளித்த பணிகளை சிறப்பாக செய்யுங்கள். தமிழக மக்களிடம், கலைஞர் மகளிர் உரிமைத்தொகை நல்ல முறையில் சென்று அடைந்துள்ளது. அதேநேரம், உங்கள் தொகுதியில் வேறு ஏதாவது பிரச்னைகள் இருந்தாலும், உடனடியாக கட்சித் தலைமைக்கு தெரியப்படுத்த வேண்டும்.

இதையும் படிங்க: புகைகிறதா திமுக – சிபிஐஎம் கூட்டணி.. மீண்டும் சீண்டிய சு.வெ

எதைப் பற்றியும் கவலைப்படாமல், உங்களுக்கு என்று கொடுக்கப்பட்டு உள்ள பணிகளைச் செய்யுங்கள். மற்றதை நாங்கள் பார்த்துக் கொள்கிறோம். சமூக வலைத்தளங்களை நன்றாக கவனிங்கள், அவதூறு பரப்புபவர்கள் மீது சட்டப்படி நடவடிக்கை எடுக்க தலைமையை அணுகுங்கள்” எனத் தெரிவித்து உள்ளதாக திமுக வட்டாரங்கள் தெரிவித்து உள்ளன.

மேலும் பேசிய ஸ்டாலின், “நாடாளுமன்றத் தேர்தலில் நூற்றுக்கு நூறு வெற்றியைப் பெற்றுச் சில மாதங்கள்கூட ஆகவில்லை, அதற்குள் அடுத்த சட்டமன்றத் தேர்தலுக்குத் தயாராக இங்கு கூடியிருக்கிறோம். சட்டமன்றத் தேர்தலிலும் நாம்தான் வெற்றி பெறப் போகிறோம். அதில் யாருக்கும் சந்தேகம் இல்லை. ஆனால், நம்முடைய அந்த வெற்றியும் நூற்றுக்கு நூறு வெற்றியாக இருக்க வேண்டும்.

நம்முடைய இலக்கு 200 தொகுதிகள். அதற்கான உழைப்பை, நீங்கள் இன்றிலிருந்தே தொடங்கியாக வேண்டும். அதற்காகத்தான் இப்போதே 234 தொகுதிகளுக்கும் தொகுதிப் பார்வையாளர்களை நியமித்துள்ளோம். புதிதிகப் பொறுப்பேற்றுள்ள அனைத்துத் தொகுதிப் பார்வையாளர்களுக்கும் என்னுடைய வாழ்த்துகளையும், பாராட்டுகளையும் தெரிவித்துக் கொள்கிறேன்.

உங்கள் தொகுதியில் கட்சியும், நம்முடைய கூட்டணியும் மகத்தான வெற்றி பெறுவதை உறுதிசெய்ய வேண்டிய பொறுப்பு உங்களுக்குத்தான் இருக்கிறது, மறந்துவிடாதீர்கள். மாநில நிர்வாகிகள் மற்றும் சார்பு அணிகளில் இருந்து தேர்ந்தெடுக்கப்பட்ட மாவட்ட, அமைப்பாளர்கள் என்று 234 பேரை, தொகுதிக்கு ஒருவர் என்று அனைத்து சட்டமன்றத் தொகுதிகளுக்கும் பார்வையாளர்களாக நியமித்துள்ளோம்.

நீங்கள் அனைவரும், பொறுப்பு அமைச்சர்கள், மாவட்டச் செயலாளர்களைச் சந்தித்து, அவர்கள் ஆலோசனைப்படி பணிகளைத் தொடங்க வேண்டும். இந்தப் பணிகளில் மாவட்டச் செயலாளர்களுக்கு உறுதுணையாக இருந்து, அவர்களின் வழிகாட்டலின்படி, தேர்தல் பணிகளை ஒருங்கிணைக்கும் பொறுப்பு, தொகுதி பார்வையாளர்களான உங்களைத்தான் சாரும்.

அடுத்த ஓராண்டு காலத்தில் சட்டமன்றத் தேர்தலுக்குத் தொகுதியை முழுமையாகத் தயார்படுத்தும் பொறுப்பும் உங்களுடையதுதான். உங்களுடைய பணிகளில் ஏதாவது உதவி தேவைப்பட்டாலோ, இல்லை சந்தேகம் இருந்தாலோ தலைமையை தொடர்பு கொள்ளுங்கள்.

தொகுதிப் பணியாளராக நியமிக்கப்பட்டுள்ள தொகுதியில், முழுமையாக வெற்றி பெறுவதற்கான வழிவகைகளைக் கண்டறிந்து பணியாற்றுங்கள். உங்களை யார் மேலும் தனிப்பட்ட முறையில் எந்தப் புகாரும் சொல்ல முடியாத அளவிற்குப் பணியாற்றுங்கள்.

உங்களின் ஒவ்வொரு அடியும், வெற்றியை நோக்கிய பயணமாக அமைய வேண்டும். இந்தியாவில் எந்த ஆட்சியும் செய்யாத மகத்தான சாதனைகளை நாம் செய்து கொண்டிருக்கிறோம். அதனால்தான், இந்தியாவின் தலைசிறந்த மாநிலமாகத் தமிழ்நாடு உயர்ந்திருக்கிறது என்று என்னால் நெஞ்சை நிமிர்த்திச் சொல்ல முடியும்.

இந்தச் சாதனைகளை மக்களிடையே பரப்புரை செய்ய வேண்டும். முறையாக பரப்புரை செய்யப்படுகிறதா என்று கண்காணிக்க வேண்டும். நம்முடைய திராவிட மாடல் ஆட்சியால் பயனடைந்த மக்கள் கோடிக்கணக்கில் இருக்கிறார்கள். அவர்களே நமக்கு மிகப்பெரிய பரப்புரையாளர்கள்.

புதுப்புது பாணிகளைக் கையில் எடுத்து, தேர்தல் பணிகளை முடுக்கிவிட வேண்டிய கடமை உங்களுக்கு உண்டு. தலைவர் கருணாநிதி, தனக்குப் பிடித்த ஊரின் பெயராக, தூத்துக்குடி மாவட்டத்தில் இருக்கும் ‘எப்போதும் வென்றான்’ ஊரைச் சொல்வார். எப்போதும் வென்றானாக நாம் பெயர் பெற வேண்டும் என்றால், எப்போதும் உழைக்க வேண்டும், எப்போதும் செயல்பட வேண்டும், எப்போதும் பணியாற்றிக் கொண்டே இருக்க வேண்டும்” என்றார்.

மேலும், துணை முதலமைச்சர் உதயநிதி ஸ்டாலின் தலைமையில், 2026 சட்டமன்றத் தேர்தலுக்கான ஒருங்கிணைப்புக் குழுவும் செயல்பட்டு வருகிறது. அதேநேரம், 2026-ல் 234 சட்டமன்றத் தொகுதிகளில் 200 தொகுதிகள் இலக்கு என திமுக கட்சித் தலைமை இலக்கு நிர்ணயித்து உள்ளது.