கொரோனா முடிவதற்குள் அடுத்த ஷாக்…குரங்கு அம்மை வைரஸ் பரவல்: அமெரிக்காவில் முதல் பாதிப்பு பதிவு..!!

வாஷிங்டன்: அமெரிக்காவில் முதன்முதலாக ஒருவருக்கு குரங்கு அம்மை பாதிப்பு கண்டறியப்பட்டுள்ளது பீதியை ஏற்படுத்தியுள்ளது.

அமெரிக்காவில் இந்த ஆண்டில் முதன்முதலாக மசாசூசெட்ஸ் நகரில் ஒருவருக்கு குரங்கு அம்மை பாதிப்பு கண்டறியப்பட்டுள்ளது. குரங்கு காய்ச்சலால் பாதிக்கப்பட்ட நபர் அண்மையில் கனடாவுக்குச் சென்று வந்தார் என சுகாதாரத்துறை தெரிவித்துள்ளது. அமெரிக்காவில் குரங்கு அம்மை பாதிப்பு கண்டறியப்பட்டுள்ள நிலையில் நோய் கட்டுப்பாடு மற்றும் தடுப்புக்கான மையங்கள் தயார் செய்யப்பட்டு வருகின்றன.

மேலும், நோயாளியுடன் தொடர்பில் இருந்தவர்களை அதிகாரிகள் மற்றும் சுகாதாரப் பாதுகாப்பு பணியாளர்கள் கண்டறிந்து கண்காணித்து வருகின்றனர். ஐரோப்பிய நாடுகளான போர்ச்சுகலில் ஐந்து பேரும், பிரிட்டனில் இரண்டு பேரும் குரங்கு அம்மையால் பாதிக்கப்பட்டுள்ளனர்.

ஸ்பெயினின் மத்திய மாட்ரிட் பிராந்தியத்தில் பலருக்கும் இந்த பாதிப்பு உறுதி செய்யப்பட்டுள்ளதால், ஐரோப்பிய நாடுகள் முழுவதும் பாதுகாப்பு நடவடிக்கைகள் எடுக்கப்பட்டு வருகின்றன. குரங்கு அம்மை வைரஸ் ஆர்த்தோபாக்ஸ் வைரஸ் குடும்பத்தைச் சேர்ந்தது, இந்த குடும்பத்தில் பெரியம்மையை ஏற்படுத்தும் வேரியோலா வைரஸ் மற்றும் பெரியம்மை தடுப்பூசியில் பயன்படுத்தப்பட்ட தடுப்பூசி வைரஸ் ஆகியவை அடங்கும்.

குரங்கு அம்மை பாதிப்பானது பெரியம்மை நோயுடன் ஒப்பிடக்கூடிய அளவுக்கு அறிகுறிகளைக் கொண்டுள்ளது, ஆனால் குறைவான தீவிரத்தன்மை கொண்டது. தடுப்பூசியின் காரணமாக 1980 ஆம் ஆண்டு உலகளவில் பெரியம்மை அழிக்கப்பட்டாலும், குரங்கு அம்மை பாதிப்பு இன்னும் மத்திய மற்றும் மேற்கு ஆப்ரிக்க நாடுகளில் பரவலாக உள்ளது.